Saan a nagbalin a naragsak ti panangsarabo ti baro a tawen ti kompaniya nga E-Value Phils. Inc., kalpasan a saan dan nga intuloy ti operasyon da idi Disyembre 31, 2025 kasaruno ti desisyon a saanen a lapdan ti pammilin ti Securities and Exchange Commission (SEC) nga ibabawi ti accreditation da.
Natakuatan ti SEC a dagiti valuation report ti E-Value para ti Villar Land ken kadagiti subsidiaries na a suportado ti negosyante ken sigud a Senate President a ni Manuel “Manny” Villar Jr., ket napno ti seryoso a nagkurangan ken saan a mapagtalkan.
Indauloan ni SEC Chairperson Francis Ed. Lim iti kanselasyon ti accreditation kalpasan ti onsite inspection a mangipakpakita a saan a simmurot ti kompaniya kadagiti international valuation standards ken agkurkurang da pay kadagiti supporting documents.
Napaay ti appraiser nga ikalintegan ti P1.33-T appraisal wenno panagngato ti gatad dagiti sanikua ken nilabsing ti kangrunaan a prinsipyo ti independence, professional competence, ken objectivity.
Malaksid kadaitoy ket impaulog pay komisyon ti kangatuan a multa a P1-M ken imbilin ti baro manen nga appraisal para kadagiti units ti Villar Land. Nagpakdaar ti SEC a dagiti peke a datos a maar-aramat kadagiti financial statements ket mabalin a mangitunda ti biddut nga impormasyon kadagiti agpupuonan.
