BR LA UNION – Nainget nga imon-monitor ti Pilipinas iti sitwasyon idiay Venezuela kasaruno dagiti report seknan iti inyuswat a nalawa nga operasyon militar nga indaulwan ti US forces.
Daytoy iti inwaragawag ti Department of Foreign Affairs (DFA).
Segun kenni Foreign Affairs Spokesperson Angelica Escalona, nagpanawagan ti Pilipinas iti amin a risoten dagiti saan a panagki-kinnaawatan iti nakapya a wagas ken liklikan dagiti addang a mabalin a mangpakaru pay ti tensyon iti rehiyon.
Iti waragawag ti DFA ket kasaruno ti anunsyo ni U.S. President Donald Trump a maipagarop a nangisayangkat ti Estados Unidos ti maysa a “large-scale strike” kontra Venezuela a nagresulta iti pannaka-aresto ni Venezuelan President Nicolas Maduro ken asawa daytoy.
Kabayatanna, pinalagipan ti Philippine Embassy dagiti Pilipino sadiay nga agtalinaed nga alerto ken amwen dagiti natalged a lugar a mabalin a paglemmengan ingkaso a kumaru iti sitwasyon.
Maibasar iti datus ti DFA, adda pakabuklan a 74 a Pilipino ti agdama nga agnanaed ken agtrab-trabaho idiay Venezuela.
