BR LA UNION – Pormal a naglukat ita nga aldaw ti Miyerkoles, Enero 14, 2026 dagiti nagduduma nga aktibidad para iti selebrasyon ti maika-45 a founding anniversary ti Don Mariano Marcos Memorial State University – Mid La Union Campos (DMMMSU-MLUC).
Ti selebrasyon ket addaan ti tema ita a tawen: Towards 2030: A Premier University of the North – Excellent, Globally Competitive, Futures-Ready.
Narugyan dagiti aktibidad babaen ti naisayangkat a Thanksgiving Mass kas panagyaman kadagiti nagapwanan ti unibersidad, simmaruno ti opisyal a pannakalukat dagiti student booth a nakaitampokan iti inobasyon, kultura, ken produkto ti nadumaduma a kolehiyo.
Naangay met ti Campus Awards and Recognition tapno padayawan dagiti staff ken estudiyante a nangipakita ti kinalaing iti bukodda a tay-ak.
Paset pay kadagiti aktibidad ti Inter-College Competitions a nairanta a mangpapigsa ti camaraderie ken sportsmanship, ken ti Retirees’ Day kas panangbigbig iti napateg a kontribusyon dagiti nagserbi ti nasao nga unibersidad.
Iti maikadwa nga aldaw, Enero 15, nakatuding a maangay ti University Awards and Recognition para kadagiti naisangsangayan nga indibidual ken grupo iti lebel ti unibersidad; Inter-College Battle of the Bands; Libnos DMMMSU-MLUC 2026, ken iti pagu-uray a Grand Concert a mangling-lingay kadagiti estudyante, alumni, ken sangaili.
Kabayatanna, iti maudi nga aldaw ti selebrasyon inton Enero 16, maisayangkat ti Alumni Day, nga agserbi a panagtitipon dagiti sigud nga estudiyante manipud iti nadumaduma a henerasyon; maisayangkat pay ti University Student Council Inter-Campus Competitions, a pakakitaan ti panagkaykaysa ken aktibo a pannakipaset dagiti estudyante manipud iti nadumaduma a kampus ti DMMMSU.
Ti tallo nga aldaw a selebrasyon ket mangipakita iti agtultuloy a tarigagay ti DMMMSU nga agbalin a Top University of the North — nalaing, globally competitive ken nakasagana kadagiti karit iti masakbayan.
Naipasdek ti DMMMSU idi Enero 15, 1981 babaen ti Presidential Decree No. 1778 a pinirmaan daydi ni sigud a Presidente Ferdinand E. Marcos Sr., kas maysa nga state university nga addaan tarigagay a mangipaay ti de kalidad nga edukasyon ken agserbi a sentro ti kinalaing, panagsukimat, ken serbisyo komunidad iti Amianan a Luzon.
