BR LA UNION – Naaddaan ti minor electrical issue iti Air Force One bayat iti panagturong ni US President Donald Trump idiay Davos, Switzerland, rason tapno agsubli iti Joint Base Andrews idiay Maryland.
Segun iti White House, dagus nga immakar ni Trump iti sabali nga eroplano tapno ituloy ti biyahe na para iti World Economic Forum.
Iti nasao a panagtataripnong, ninamnama a talantanen ni Trump iti kontrobersyal a gakatna nga ipasidong iti Amerika ti Greenland, ngem nainget a tinubngar dagiti kaalyado iti North Atlantic Treaty Organization (NATO).
Impaganetget ni Trump, a napateg ti Greenland para iti nasyunal a seguridad ti U.S. ken saanna nga ipa-igid ti panagusar ti puwersa nu kasapolan.
Malaksid dayta, iyam-ammo na iti Board of Peace, a maysa a baro a mekanismo a mabalin a maisukat wenno karibal iti United Nations.
Nagpangta pay ti10% tariff kontra iti walo a pagilian a NATO nu saan da a maki-tinnunos seknan iti Greenland.
Idiay Davos, inpanakkel ni Trump iti maipagarop a panagballaygi ti administrasyon na iti panangidur-as ti ekonomiya ken panagbaba ti presyo dagiti magat-gatang.
Iti laksid dagiti kontrobersiya, imapaganetget ni Trump nga agtaltalinaed a kabaraan ken kapintasan ti ekonomiya ti Amerika iti intero a lubong.
