Impannakkel ni Presidente Ferdinand Marcos Jr. a manipud Hulio 2022 agingga ti Enero 2026 ket adda ti nasurok a 423,000 housing units ti naipatakder ken napinansia babaen ti Pabahay program ti gobierno.
Inaramid ti Presidente iti waragawag kabayatan ti pannakarambak ti maika-7 nga anibersario ti Department of Human Settlements and Urban Development (DHSUD) ket sadiay nga impaganetget na a papigsaen ti gobierno iti Expanded Pambansang Pabahay Program wenno 4PH.
Panggep ti gobierno a mapapartak iti konstruksion babaen ti moderno a teknolohia, karaman iti panagbisita iti precast plant tapno mapapartak iti produksion dagiti balay.
Naipaay pay kadagiti benepisiario dagiti symbolic keys, Certificate of Lot Award, tseke para ti Enhanced Community Mortgage Program (ECMP), ken Certificate of Entitlement para kadagiti lugar a sakop ti Presidential Proclamation.
Impaganetget ti Presidente a gapu iti reporma ti Pagibig Fund, bimmaba ti interes iti housing loan ken ad-adu a tattao ti nabenepisiaran iti subsidya ti gobierno.
Impasigurado ni Presidente Marcos nga agtinnulong ti gobierno ken ti pribado a sektor tapno ad-adda a mapalawa iti sakup ti 4PH ken masigurado nga iti tunggal pamilia a Pilipino ket maaddaan ti natalged, disente ken makabael a pagtaengan iti sidong ti Bagong Pilipinas.###
