BR LA UNION – Agsag-sagana ita ti Department of Energy (DOE) para iti posible a worst case scenario iti mapaspasamak a riribok idiay Middle East, a nanggubway ti lalo pay a panagngato ti presyo dagiti produkto a petrolyo ditoy pagilian.
Daytoy ti imbatad ni Energy Secretary Sharon Garin idi dimmar-ay iti panagdengngeg ti house committee on ways and means, a nakatalantanan ti panawagan a temporaryo a suspindiren iti excise tax iti oil.
Segun kenni Secretary Garin, awan ti direkta a kontrol ti gobyerno iti panagngato ti presyo ti gasolina, agsipudta nakadepende daytoy iti sangalubongan a merkado.
Kinuna na nga awan met iti bileg ti ahensiya a lapdan ti panagngato ti presyo ti langis.
Inlawlawag ti sekretaryo a dakdakkel nga isyu iti supply ngem ti crude oil, agsipudta iti kangrunaan nga ang-angkaten ti pagilian ket refined petroleum products manipud China, Japan, ken South Korea ken saan a direkta manipud Middle East.
Nupay kasta, mabalin latta a maapektaran ti pagilian iti presyo ken supply nu kumaru ti tensiyon idiay Middle East, nangruna itan a nairikep ti Strait of Hormuz.
Innayon ni Garin nga agtultuloy ti pannaki-taripnong da kadagiti kumpanya ti langis tapno saganaan ti posible nga epekto na iti pagilian.
