BR LA UNION – Inaprubaran ti House Committee on Ways and Means iti gakat a linteg a mangipaay ti bileg kenni President Ferdinand “Bongbong” Marcos Jr. a temporaryo a suspindiren wenno kissayan iti excise tax kadagiti produkto a petrolyo tapno maprotektaran dagiti Pilipino kontra iti panagngato ti presyo ti langis iti sangalubongan a merkado.
Pinagtipon ti substitute bill dagiti 15 a gakat ken dua a joint resolution, kabilang iti House Bill 8292 nga indatag da Speaker Faustino “Bojie” Dy III ken Ilocos Norte Rep. Sandro Marcos, nga addaan ti ranta a palubosan iti Presidente a mangipatungpal ti suspensyon iti fuel excise tax iti panawen ti national wenno global crisis pang-ekonomiya.
Iti sidong ti gakat, mabalin nga ipatungpal ti suspensyon nu umabot wenno lumbes iti $80 kada bariles iti average a presyo ti Dubai crude oil iti uneg ti maysa a makabulan wenno naideklara ti national emergency a nangigubway ti nakaru a panagngato ti presyo ti lana ditoy pagilian.
Iti suspensyon ket mabalin nga agpaut ti agingga innem a bulan ken mabalin a mapaway-wayan agingga sibubukel a tawen, ngem agtalinaed laeng ti nasao a bileg iti Presidente agingga Disyembre 31, 2028.
Iti kanito a maipatungpal ti suspensyon, kasapolan nga agsumite ti report ti Presidente idiay Kongreso iti uneg ti 15 nga aldaw ken binulan.
Iti gakat ket maisumite iti plenaryo idiay Kamara para iti kanayunan a deliberasyon.
