BR LA UNION – Pormal nga indeklara ni Presidente Ferdinand R. Marcos Jr. ti state of national energy emergency tapno protektaran ti pagilian manipud iti nakaru nga epekto ti mapaspasamak a tension ken rinnupak idiay Middle East.
Nakailanad iti Executive Order (E.O.) No. 110 a naipaulog ita nga aldaw, Marso 24, 2026, nairanta ti nasao nga addang tapno dagus a mataming ti pangta iti kinatalged ken umdas a suplay ti enerhiya ti pagilian kalpasan a madetermina ti Department of Energy (DOE) ti kritikal a sitwasyon.
Maibasar iti direktiba, ti pannakairikep ti Strait of Hormuz ken susik iti baetan ti Estados Unidos, Israel, ken Iran ken nangparnuay ti nakaru a problema ken pannaka-singa iti mangpatpataud iti nakaro a pannakasinga kadagiti sangalubongan a pannakaipatulod ti lana.
Gapu ta net importer ti Pilipinas kadagiti produkto ti petroleo, aminen ti gobierno a nalaka unay ti pagilian iti kellaat a panagngato ti presio ti lana ken pannakasinga dagiti supply chain.
Tapno makissayan ti epektona iti publiko ken ekonomiya, imbilin pay ti Presidente ti nasaknap a pannakaipatungpal ti Unified Package for Livelihoods, Industry, Food, and Transport wenno UPLIFT.
Daytoy ti agserbi kas opisyal a whole-of-government response framework ken sungbat ti sibubukel a gobierno tapno masigurado ti agtultuloy nga ayus ti negosyo ken pannakaipaay dagiti nasken a serbisyo, partikular kadagiti sektor a nakaro ti pannakaapektarda.
Maibasar iti maudi a panid ti nasao a pammilin a pinirmaan ni Acting Executive Secretary Ralph G. Recto, agtalinaed nga epektibo ti deklarasyon iti uneg ti maysa a tawen manipud pannakairuarna, malaksid no ibabawi wenno paway-wayan ti Chief Executive.
