BR LA UNION – Siniguro ni Presidente Ferdinand Marcos Jr., nga umdas iti suplay ti langis ditoy pagilian iti uneg ti nasurok-kumurang nga 45 nga aldaw iti tengnga nga agpeligro iti sangalubongan a suplay.
Segun iti Presidente, awan ti rumbeng a pagdanagan wenno saan a nasken nga ag panic ti publiko.
Binilin ti Presidente iti Department of Energy nga amwen iti agdama nga imbentaryo ti diesel, gasolina, kerosene, ken jet fuel, ken siguradwen nga agtultuloy ti panagsaol ti kanayunan a supplier.
Imbaga ti Presidente a saan pat a sigurado nu kasatnu kapaut a maapektaran iti suplay idiay Middle East, isunga agtultuloy ti pannaki-koordinar ti gobyerno kadagiti supplier ken partner countries.
Siniguro pay ni President Marcos nga i-respeto iti agraraira a kontrata iti panag-import ti langis tapno masiguro nga agtul-tuloy ti panagsangpet iti suplay ditoy Pilipinas.
Aminado ti Presidente nga idi immuna ket marigatan dagiti supplier a mangipaay ti detalye gapu iti kaawan panniguro iti sitwasyon, kabilang iti presyo.
Nupay kasta, in-inut nga agbal-balin a naannayas iti taray ti suplay kalpasan ti agtul-tuloy a koordinasyon ken panagsapol ti alternatibo a sources a saan nga apektado ti gubat idiay Middle East.
Innayon pay ti Presidente a numan saan pay a naan-anay a sigurado iti napapaut a suplay, namnamaen nga agtultuloy ti panagsangpet ti langis ditoy pagilian kalpasan ti 45 nga aldaw gapu kadagiti baro supplier ken katulagan .
