Naitantan ti panagdengngeg ti Senate Blue Ribbon Committee inton Abril 14 seknan paylaeng dagiti maanomalya a flood control projects kalpasan a mapaay a mangisubmitir ti affidavit ni sigud nga Ilocos Governor Luis “Chavit” Singson kasta met iti kinakurang ti pirma iti partial committee report.
Segun kenni Senate President Pro Tempore ken Blue Ribbon Committee chairperson Panfilo “Ping” Lacson, mabalin a maituloy ti panagdengngeg apaman makaisubmitir ni Singson ti draft ti sworn statement na ken manayunan ti pirma iti report nga isu iti maipresentar sadiay plenaryo.
Manipud iti surat ni Lacson ket nakailanad nga matantan ti panagdengngeg agingga saan a maisubmitir ti affidavit ken ti maseknan a dokumento. Maipalagip a naikkan laeng ti sigud a gobernador ti agingga Abril 7, ngem pulos nga awan iti insungbat ti kampo na.
Iti agdama ket up-uppat laeng ti nagpirma iti partial report — kurang pay ti siyam tapno maipasango daitoy sadiay Senado.
Ad-adalen metten ni Lacson iti panangipila ti Chairman’s Report a maisubmitir idiay Office of the Ombudsman, kadwa dagiti dokumento ken ebidensya a nagun-od kadagiti saan bumaba a pito a panagdengngeg a mabalin a makatulong iti imbestigasyon.
