Ngimmato iti pakabuklan a kita ti gaming industry ditoy Pilipinas iti 6.39% idi tawen 2025, segun ti Philippine Amusement and Gaming Corporation (PAGCOR).
Maibasar iti datos ti PAGCOR, dimmanon ti gross gaming revenues (GGR) iti ₱396.14 billion idi 2025, nangatngato no idilig iti ₱372.33 billion idi 2024. Ti panagngato ket gapu iti panagdur-as ti online ken electronic gaming.
Segun iti PAGCOR, dimmur-as iti 30.44% ken dimmanon ti ₱201.12 billion dagiti e-games ken online gaming segment a pakairamanan ti e-bingo ken dadduma pay a digital betting platforms.
Daytoy itan ti kadakkelan a bingay ti matgedan ti industria, a mangibagi iti 50.77% iti pakabuklan a gross gaming revenues (GGR).
Kabayatanna, bimmaba iti kita dagiti traditional wenno brick-and-mortar casinos ti 9.58% iti ₱182.50 billion, bayat a ti PAGCOR-operated casinos ket bimmagsak ti 20.95% iti ₱12.52 billion.
Segun kenni PAGCOR Chairman ken CEO Alejandro Tengco, nalawag a nagbaliwen iti industria gapu ta iti online gaming ti kangrunaan a mangtignay iti panagdur-as, saan laeng a supplementary segment.
Inlawlawagna pay a nupay adda temporario a panagbaba iti maikatlo a quarter ti 2025 gapu iti panagbalbaliw ti digital payment systems, nakatulong daytoy iti naing-inget a regulasion, nataltalged a transaksion, ken nangatngato a panagtalek iti industria.###
