BR LA UNION – Inbutaktak ti maysa a testigo iti panagdengngeg ti Sandiganbayan nga umabot iti P299 milyon a pisos a cash a naikarga laeng iti karton ti grocery iti maipagarop a naideliber iti opisina ti maysa a sigud nga opisyal ti Department of Public Works and Highways (DPWH).
Iti nagbalin a testimonya na idi Lunes ni Monica Ocampo-Santos, liaison officer ti contractor nga SYMS Construction, inraman na ni sigud a DPWH Assistant District Engineer Brice Hernandez.
Segun iti testigo, ti nasao a kantidad ket nailatang para iti maipagarop a panagipatakder ti lima a government contracts a napangabakan ti SYMS babaen ti lisensya nga impabulod kadakuada ni Hernandez.
Idi damagen ti korte nu kasatno nga inturong da ti dakkel a kantidad ti kuwarta, indetalye ni Ocampo-Santos iti wagas ti transaksyon.
Inpaganetget pay ni Ocampo-Santos a karaman pay a nai-deliver malaksid ti P299 milyon, iti P74 milyon a maipagarop nga innala ni Hernandez iti P92.8 milyon a mapapati a ghost project idiay Pandi, Bulacan.
Ti nasao a proyekto iti sentro ti sangsangwen a malversation case ni sigud a Senador Ramon Bong Revilla Jr., Hernandez, ken lima pay nga opisyal ti DPWH.
Kas pammaneknek, nangiprisinta iti testigo kadagiti screenshots ti sinnukat da ti text messages kenni Hernandez idi Mayo 19, 2025, ken kinumpirma na iti pannakaitulod ti kuwarta kabigatanna wenno malem ti Mayo 20 .
