Inlibak ni sigud nga Health Undersecretary Kenneth Hartigan-Go nga inpromote-na iti pannakausar ti Dengvaxia, iti laksid ti sigud a koneksionna iti maysa a foundation a mainaig iti distributor daytoy.
Iti panagparangna kas saksi iti Sandiganbayan, kenuna ni Hartigan-Go a ti Zuellig Family Foundation, a nagserbianna kas executive director manipud 2001 agingga 2009, ket pulos a saan a nag-advertise wenno nangilako ti aniaman a produkto.
Nupay kasta, inaklon daytoy a pinirmaanna idi 2015 iti rekomendasion ti Formulary Executive Council a mangited ti exemption iti Dengvaxia manipud ti Philippine National Drug Formulary. Daytoy nga exemption kuma ti mangpalubos iti gobierno a legal a gumatang ti bakuna, ngem saan a naaprobaran.
Segun kadagiti prosecutor, dinakamat ti rekomendasion iti panagadal ti Sanofi, iti agaramid ti Dengvaxia. Nupay kasta, kenuna ni Hartigan-Go a saanna ammo nga adda ti kastoy a reference iti dokumento.
Mainaig ti kaso iti mapapati nga iregularidad iti panaggatang iti ₱3.5 billion a gatad ti Dengvaxia idi 2015. Karaman kadagiti nakasuan ti sigud nga Health Secretary ken agdama nga House Deputy Speaker a ni Janette Garin ken dadduma pay.
Segun ti Office of the Ombudsman, maipagarup a naaramat iti pondo ti gobierno iti illegal a panaggatang ti bakuna, a saan a paset iti Expanded Program for Immunization ken awan met ti pammalubos manipud iti drug formulary—maysa a panaglabsing kadagiti agdama a linteg ken regulasyon, karaman ti Executive Order No. 49.###
