BR LA UNION – Isagsagana ni Atty. Manases Carpio, asawa ni Vice President Sara Duterte, ti panangidatag ti kaso a kriminal kontra iti sumagmamano nga opisyal ti Bangko Sentral ng Pilipinas (BSP), Anti-Money Laundering Council (AMLC), ken sumagmamano a kongresista idiay Quezon City Prosecutor’s Office inton Lunes, Abril 27, 2026.
Kabilang dagiti ireklamo na da BSP Governor Eli Remolona Jr., AMLC Executive Director Ronel Buenaventura, ken sumagmamano a miyembro ti Kamara isuda House Committee on Justice Chair Gerville Luistro, Percival Cendaña, Chel Diokno ti Akbayan Party-List ken Mamamayang Liberal Party-List Leila de Lima.
Maibasar daytoy iti maipagarop a panaglabsing iti Anti-Money Laundering Act, Bank Secrecy Law, ken Data Privacy Act gapu iti panangirwar ti sensitibo a banking records.
Daytoy ket kasaruno ti panangi-report ti AMLC idiay Kamara de Representantes nga adda aganay P6.77 billion “suspicious” ken “covered” transactions a konektado kada Vice President Sara Duterte ken Carpio iti uneg ti dandani dua a dekada.
Segun iti AMLC, kabilang ditoy iti binilyon a simrek ken rimwar iti account ti agassawa bayat nga adda pay ti saan a madetermina ti da-an a sistema.
Impaganetget ni Carpio, ilegal ti maipagarop a panangirwar dagiti rekord ken inusar iti maipagarop a “black propaganda” kontra pamilya Duterte, nangruna iti tengnga dagiti isyu politikal ken impeachment proceedings.
Kinunana a protektado ti linteg iti bank records ken saan a rumbeng a maipakita daytoy.
Nainget met a pinaglibakan ti sumagmamano a mammanday linteg iti alegasyon.
Segun kada De Lima ken Cendaña, sakop iti bileg ti Kamara iti panangdengngeg ti impeachment ken saan a maibilang a panaglabsing iti bank secrecy laws.
Impaganetget da pay a paset daytoy iti accountability process ken adda legal a basaran iti panangtalantan dagiti financial transaction nu adda isyu ti posible nga anomalya.
Kabayatanna, impaganetget ti sumagmamano nga opisyal ti Kamara a ti reklamo ket saan a panangilibak nga awan kinapudno na dagiti financial records a nakita ti AMLC ngem ketdi nakasentro iti isyu ti panangirwar ti impormasyon.
