BR LA UNION – Naisumiten iti napuskol a dokumento a kasapolan ti International Criminal Police Organization (Interpol) tapno makapag-isyu ti red notice kontra kenni sigud a Congressman Elizaldy Co, segun kenni Philippine Center on Transnational Crime (PCTC) executive director Maj. Gen. Romeo Prestoza.
Kinuna na, naipatulod dan dagiti dokumento iti Interpol secretariat ken nailawlawag a kasapolan nga ipaganetget da iti Interpol a dadakkel a kaso wenno krimen iti sangsangwen ni Co, ket kasapolan a mairwar ti red notice.
Segun iti Interpol, ti red notice ket maysa a request iti law enforcement iti intero a lubong tapno maamwan iti lokasyon ken temporaryo nga arestaren iti maysa nga indibidwal a wanted wenno sap-sapolen ti maysa a kumidkiddaw a member country wenno maysa nga international tribunal a nakaipenpenan iti extradition, panagsuko wenno kapada a legal a panaggunay.
Ngem inlawlawag ti Interpol a saan daytoy a maysa nga international arrest warrant.
Maipalagip nga immunan a kinumpirma ni DOJ Secretary Frederick Vida nga awanen iti kustodiya dagiti Czech officials ni Zaldy Co ngem adda pay laeng daytoy iti uneg ti “Schengen Area.”
