Naangay idi kalman, Mayo 5, 2026, ditoy Siudad ti San Fernando, La Union iti panagtitipon ti Regional Community-Based Monitoring System Coordinating Board (RCCB) iti Rehiyon Uno tapno mapapigsa pay ti panagusar ti datos manipud iti komunidad para iti nasayaat a panagplano ken panagdur-as ti rehion.
Indauloan ni Regional Director Stephanie F. Christiansen, CESO III, ti Department of Economy, Planning, and Development – Regional Office I (DEPDev–ROI), ken Chairperson ti RCCB, ti nakuna a miting. Nakipaset met ni Co-Chairperson Atty. Sheila O. De Guzman, Regional Director ti Philippine Statistics Authority – Regional Statistical Services Office 01 (PSA-RSSO 01), a kaduana dagiti technical staff ti dua nga ahensia.
Nagtipon dagiti mangibagbagi iti naduma-duma a regional government agencies ken local government units tapno masiguro iti umno ken napapanahon a datos. Panggep daytoy a mailungalong dagiti polisiya ken programa a nakabasar iti ebidensia babaen ti panagusar ti Community-Based Monitoring System (CBMS), a mangiturong iti nasayaat, inklusibo ken sustainable a masakbayan para iti rehion. (Report by Bombo Jordan)
Photo Courtesy: PSA Region I Ilocos
