BR LA UNION – Kinumpirma ni Senate President Pro Tempore Panfilo ”Ping” Lacson nga adda naawat na nga impormasyon a naglaun iti maipagarop a hand written ti natayen a ni sigud a Department of Public Works and Highways (DPWH) undersecretary Maria Catalina Cabral, a nakailanadan iti maipagarop a P500 milyon a balor ti proyekto a nailatang kenni Sen. Rodante Marcoleta.
nupay kasta, inlawlawag ni Lacson a ti kaadda ti “allocables” ket saan nga ilegal, ngem kasapolan kunana a masukimat nu dagiti nasao a proyekto ket naipatungpal met laeng a nasayaat wenno adda dagiti “ghost” wenno substandard projects.
Segun pay iti senador, sukimaten ti Senado dagiti naisumite a proyekto dagiti mammanday linteg tapno madetermina nu adda dagiti iregularidad a proyekto.
Kinuna pay ni Lacson, nga adu a mammanday linteg idiay senado iti addaan kapada nga “allocables,” a segun kenkuana ket maibilang a modern pork barrel.
Kabayatanna, naiinget met a pinaglibakan ni Marcoleta iti akusasyon ken inawaganna a “malicious,” awan basaran iti alegasyon ken maipagarop a maysa laeng a gandat a panangdadael iti reputasyon na.
Segun kenni Marcoleta, nu iti panangipaay ti endorsement kadagiti proyekto ket pagibasaran ti imbestigasyon, dandani amin a senador ket rumbeng a maimbestigaran agsipudta gagangay kunana a maar-aramid idiay Kongreso.
Impaganetget na pay a saan a mabalin a piliten dagiti senador nga agpirma iti partial committee report ken inakusaran na ni Lacson a selective iti panagsapol ti pagsungbaten.
Nagramot ti tensyon iti baetan dagiti dua kalpasan a masukatan ni Marcoleta kas chairman ti Senate Blue Ribbon Committee, nga ita ket idadaulwan ni Lacson, seknan iti imbestigasyon iti maipagarop nga iregularidad iti flood control projects.
