Nagsapata ti Thailand ken Cambodia nga ituloy da ti silulukat a komunikasyon ken liklikan dagiti addang a mabalin a mangpakaru iti tensyon, kalpasan iti trilateral meeting nga indauloan ti Pilipinas iti sidelines ti 48th ASEAN Summit.
Indauloan ni Presidente Ferdinand Marcos Jr. iti summit, kadwa da Cambodian Prime Minister Hun Manet ken Thai Prime Minister Anutin Charnvirakul kas paset ti akem ti Pilipinas a kas ASEAN chairman.
Segun kenni PBBM, tarigagay ti panagtaripnong a mangited iti “meaningful space for constructive dialogue” mainaig ti agtultuloy a tensyon iti beddeng dagiti dua a pagilian.
Iti naangay a joint press conference ket kinuna ti Presidente a binigbig dagiti dua a lider ti kinapateg iti panaglapped, silulukat a komunikasyon, ken nakapia a panagresolbar kadagiti problema.
Naangay daitoy iti kangitingitan ti tensyon ti nagbaetan iti Thailand ken Cambodia mainaig iti mapagsusupiatan a teritoryo asideg ti Preah Vihear temple ken dadduma pay a paset ti Gulf of Thailand.
Nagyaman met da Hun Manet ken Anutin ditoy Pilipinas iti panangiyuswat iti dayalogo, kasaruno ti panangipaganetget ni Anutin a napateg a lillikan iti maki-apa iti kaarruba a pagilian.
Inwaragawag ni PBBM iti panagipadanon na iti mandato ti ASEAN Observer Team (AOT) agingga Hulyo tapno maituloy ti panangipatungpal kadagiti katulagan ti nagbaetan ti Thailand ken Cambodia.
