BR LA UNION – Pormal a nabotosan kas baro a Presidente idiay Senado ni Senator Alan Peter Cayetano iti naisayangkat a binnotosan iti plenary session ti Nangato a Pagpandayan Linteg ti Kongreso idi kalman, Lunes, Mayo 11.
Iti pakabuklan a 24 a senador a dimmar-ay iti sesyon, nakagun-od ni Cayetano ti 13 a botos, umdas tapno abaken ni Senator Vicente “Tito” Sotto III a nakagun-od ti 9 a botos.
Kabilang dagiti nagbotos a pabor kenni Cayetano malaksid iti siyam a kakadwa na iti Minority bloc, ket iti kabsat na a ni Sen. Pia Cayetano ken ti agkabsat a Sen. Camille ken Mark Villar.
Dagiti met siyam a senador a nagbotos kenni Sen. Sotto ket isuda Sen. Bam Aquino, Win Gatchalian, Risa Hontiveros, Panfilo Lacson, Lito Lapid, Kiko Pangilinan, Raffy Tulfo, Erwin Tulfo ken Tito Sotto.
Dua met a senador ti nagdesisyon nga ag-abstain kabilang da Sen. JV Ejercito ken Sen. Juan Miguel Zubiri.
Ni Cayetano ti maikapat a lider ti Senado iti sidong ti administrasyon Marcos. Maipalagip nga immuna a nagserbi kas Senate President ni Sen. Juan Miguel Zubiri idi rugi ti administrasyon, simmaruno ni Sen. Francis “Chiz” Escudero idi 2024, ken Sen. Tito Sotto idi 2025.
Napasamak ti panagbalasa iti tengnga ti nabara nga isyu seknan iti Articles of Impeachment kontra kenni Vice President Sara Duterte.
Ngem nainget a pinaglibakan ti baro a Senate President nga adda pakainaigan iti impeachment case kontra kenni Vice President Sara Duterte ti pannakaipatugaw na kas lider ti Senado idi kalman, Mayo 11, 2026.
