BR LA UNION – Nagkadwa a pimmanaw iti Senate compound da Senador Ronald “Bato” dela Rosa ken Senador Robinhood Padilla, sumagmamano nga oras kalpasan iti serye ti panagpaputok ti paltog iti maikadwa a kadsaaran ti senate building idi rabii ti Miyerkules, Mayo 13.
Segun kenni Senate Sergeant-at-Arms Mao Aplasca, makita iti CCTV footage ken iti report ti Senate security a nagna laeng dagiti dua a senador a nagturong iti behikulo ni Padilla.
Innayon ni Aplasca, nga arigna saan nga inlemmeng dagiti dua a senador ti ipapanaw da.
Nupay kasta, mangisayangkat latta ti imbestigasyon ti Office of the Sergeant-at-Arms (OSAA) nu apay a saan da a nagpakada wenno linapdan dagiti nakabantay a security personnel.
Immunan a kinumpirma ni Senate President Alan Peter Cayetano nga awanen iti protective custody ti Senado ni Senador Ronald “Bato” dela Rosa kalpasan a boluntaryo a pimmanaw.
Ngem impaganetget ni Cayetano a nawaya a pumanaw idiay Senado ni Dela Rosa agsipudta awan pay met ti naawat nga arrest warrant manipud iti lokal a korte ti Pilipinas.
Maipagarop a pimmanaw ni dela Rosa pasado alas-2:00 ti parbangon idi Huwebes, Mayo 14.
Maipalagip nga idi Lunes, naipasidong ni Dela Rosa iti protective custody ti Senado kalpasan a ginandat nga arestaren dagiti kameng ti National Bureau of Investigation (NBI) iti bileg ti naiyisyu nga arrest warrant ti International Criminal Court (ICC).
Naawagan ni Dela Rosa kas “indirect co-perpetrators” ni sigud a presidente Rodrigo Duterte iti kaso a crimes against humanity gapu iti maipagarop a pammapatay iti sidong ti Duterte administration manipud 2016 agingga 2018.
