BR LA UNION – Imbasura ti Pre-Trial Chamber I ti International Criminal Court (ICC) iti kadawatan ti depensa ni sigud a presidente Rodrigo Duterte a palubosan da nga iyapela ti nagbalin a desisyon seknan dagiti kaso a “crimes against humanity” seknan iti ‘war on drugs’ campaign ti sigud nga administrasyon.
Iti 12-pinanid a desisyon, sangsangkamaysa nga imbasura dagiti tallo nga ukom nga isuda Presiding Judge Julia Antoanella Motoc, Judge Reine Adélaïde Sophie Alapini-Gansou, ken Judge María del Socorro Flores Liera iti kadawatan ti depensa ti sigud a presidente.
Segun iti kampo ni Duterte, maipagarop a nalawa unay iti sakopen dagiti kaso. Ngem segun iti prosekusyon, umno laeng iti inlatag ti korte a sakop dagiti kaso ti sigud a presidente ken maipagarop a nailawlawag dagiti basaran ti ebidensiya a nausar iti desisyon.
Imbaga pay ti depensa, a saan nga umdas iti palawag ti korte iti ebidensya a nausar, ngem sungbat ti prosekusyon, sinurot ti Pre-Trial Chamber ti umno a proseso ken saanen a kasapolan a saggaysaen ti amin nga ebidensya iti nagbalin a desisyon daytoy.
Maipalagip nga idi Abril 23, kinumpirma ti ICC dagiti kaso kontra kenni Duterte seknan iti maipagarop a pammapatay iti sidong ti kampanya na kontra iligal a droga, kabilang dagiti insidente sipud pay idi mayor idiay Davao City agingga a nagbalin a presidente.
Kabilang dagiti kaso a sangsangwen na ket iti murder ken attempted murder kas crimes against humanity, nga adda pakainaiganna kadagiti biktima iti naduma-duma nga operasyon ditoy Pilipinas manipud 2013 agingga 2018.
