BR LA UNION – Nag-overheat nga electric fan ti makagapo iti timpuar nga uram iti maysa a puwesto ti mini grocery idi rabii ti Domingo, Hunyo 7, 2026.
Partikular a napasamak ti uram iti uneg ti merkado publiko ditoy siyudad ti San Fernando, La Union.
Nakauman ti Bombo Radyo La Union iti akinkukua ti puwesto a ni Michelle Alar, ket kinumpirma na a ti nakasaksak ken nag-overheat nga electric fan ti nagtaudan ti uram.
Segun kenni Alar, nalipatan da nga inuksot ti sak-sakan gaputi panagdar-daras da a pimmanaw, kalpasan a naipadamag kadakuada a naaksidente ti anak da ken naiturong iti ospital.
Istorya ni Alar, a kasangsangpetda pay laeng iti ospital idi makaawatda ti tawag a maur-uram ti puwesto da iti merkado.
Nupay kasta, saan a dimmakkel ti apoy gaputi dagus a panagresponde ti maysa a lalaki nga agsak-sakdo ti danum a nakakita ti asok ken dagus a kimmiddaw ti tulong kadagiti am-mmo na, kadagiti guwardiya, ken iti Bureau of Fire Protection (BFP).
Nasebseban ti apoy babaen ti fire extinguisher ken saanen a nasangpetan dagiti bombero.
Gaputi pasamak, nangipaay ni Michelle iti napateg a palagip kadagiti padana a wet market traders, saan a lipaten nga i-unplug amin a de-koryente nga alikamen tapno maliklikan iti uram.
