BR LA UNION – Nangiruar ti baro nga alegasyon ti sumagmamano a bodyguard ni sigud nga Ako Bicol Party-list Representative Zaldy Co kalpasan a naginagan da iti dadduma pay nga opisyal ti gobyerno ken personalidad iti media a maipagarop nga immawat ti kuwarta manipud iti sigud a kongresista.
Iti maysa a presscon idi kalman, Hunyo 16, inyam-ammo ti abogado ti grupo a ni Atty. Levi Baligod, dagiti uppat a baro a testigo.
Maysa kadakuada ti nangibaga a karaman isuna a nagitulod kadagiti maleta a maipagarop a para kada sigud a House Speaker Martin Romualdez ken Senator Erwin Tulfo.
Inraman pay dagiti nagpabigbig a ”bag-men” ni Co ni Commission on Elections (COMELEC) Chairperson George Erwin Garcia, a maipagarop nga immawat ti kuwarta.
Ngem dagus a pinaglibakan ni Garcia ken inawaganna a kinaulbod dagiti akusasyon.
Maysa pay a sigud nga aide ti nangibaga a maipagarop a nagitulod da ti uppat a maleta nga adda karga na a kuwarta iti balay ni Senator Francis Escudero.
Nangipakita pay dagiti testigo ti sumagmamano a ladawan a makuna nga adda pakainaiganna iti waragawag dagitoy.
Kabilang nga impakita da iti ladawan da Senator Kiko Pangilinan ken Sharon Cuneta kadwa ti sumagmamano a tao ni Co.
Nupay kasta, awanen ti impaay da a kanayunan a detalye nu anya ti koneksiyon na iti alegasyon dagitoy.
Kinontra met ni Cuneta iti waragawag ti sigud a bodyguard ni Co ken imbaga na a bin-ig a kinaulbod dagiti akusasyon kontra kadakuada.
Nangipakita pay ti nasao a grupo ti ladawan nga adda ni MMDA General Manager ken sigud a PNP Chief Nicolas Torre.
Segun kadagiti bodyguards, ladawan daytoy idi maipagarop a maal-allokoy da nga ibabawi ti immuna a waragawag da idiay Senado.
Kabayatanna, imbaga pay dagiti sigud a bodyguard a nagitulodda pay iti paper bag a naglaun ti kuwarta iti sumagmamano a personalidad iti media, kabilang da TV journalist Arnold Clavio ken kolumnista a ni Mon Tulfo.
Dagus met daytoy a pinaglibakan ni Clavio ken kinarit na dagiti agak-akusar a mangipakita ti ebidensya.
Kabayatanna, kinatawaan laeng ni Mon Tulfo iti alegasyon ken kinuwestiyon na nu kasatnu nga umanay iti dakkel a kantidad ti kuwarta iti maysa a paper bag.
Agtultuloy ti panangikagumaan ti Bombo Radyo a maala ti statement dagiti nadakamat nga opisyal ken personalidad.
