BR LA UNION – Pinaglibakan ti kampo wenno defense team ni Vice President Sara Duterte iti akusasyon ti House prosecution panel a tul-tuladen wenno kop-kopyaen da iti listaan dagiti testigo ken ebidensya para iti umadaninn nga impeachment trial.
Segun kenni Atty. Michael Poa, tagapagsarita ti kampo ti Bise Presidente, saan a maitunos ti termino a “mirroring” wenno “adopting”.
Inlawlawag ni Atty. Poa, dandani naggiddan a nagsumite iti agsumbangir a kampo iti pre-trial brief idiay Senado idi Hunyo 15.
Impaganetget na a karbengan ken prerogatibo ti depensa ken ti prosekusyon nga agpili iti testigo wenno dokumento a tarigagay da nga isango iti korte.
Tapno paneknekan a saan da a mangnamnama kadagiti dokumento ti prosekusyon, kinedkedan ti depensa iti kadawatan ti prosekusyon para iti common marking wenno maymaysa a panangmarka dagiti ebidensya, imbes ket inrekomenda da nga aramiden a nagsina iti marking dagiti dokumento tapno agbalin a naannad.
Ingkaso a mangidatag iti prosekusyon ti request, mosyon wenno manifestation seknan iti isyu, nakasagana ti depensa a sungbatan daytoy.
