Insingasing ti Department of the Interior and Local Government (DILG) iti posibilidad ti naan-anay a pannakaiparit dagiti online video games a naglaon iti nakaro a kinaranggas.
Segun kenni DILG Secretary Jonvic Remulla, rumbeng nga adalen ti Kongreso ken dagiti maseknan nga ahensia iti singasing a mangsalaknib kadagiti agtutubo a Pilipino.
Daytoy ket kalpasan dagiti report a maysa kadagiti suspek ti pammaltog iti maysa a pagadalan idiay Tacloban City ti maipagarup a naissem ti online game a “GoreBox.”
Segun ti Cybercrime Investigation and Coordinating Center (CICC), palubosan ti GoreBox dagiti players nga agusar kadagiti armas ken mangpataud kadagiti naranggas nga eksena.
Temporario met a linapdan ti CICC iti access iti ay-ayam bayat ti panangsukimat iti posible nga epekto daytoy.
Kenuna ni Secretary Remulla a mabalin met a maikonsiderar iti kapada nga addang kontra kadagiti dadduma nga online games nga addaan ti kapada a content.
Nupay kasta, ad-adalen pay laeng dagiti eksperto no adda ti direkta a pakainaigan dagiti naranggas a video game iti aktual a naranggas a kababalin, gapu ta ado met a banag iti mangapektar iti daytoy.###
