Nagtaripnong ti Department of Labor and Employment (DOLE) ken ti Metropolitan Manila Development Authority (MMDA) tapno pagsaritaan iti pannakaideploy ti agarop 10,000 a benepisiario ti Tulong Panghanapbuhay sa Ating Disadvantaged Workers (TUPAD) a tumulong iti panagdalus ken flood mitigation efforts idiay Metro Manila a mangrugi inton Hulio 17.
Napagsasaritaan iti implementasion ti programa a pakairamanan ti training, equipment, ken personal protective equipment wenno PPE para kadagiti benepisiario.
Segun kenni MMDA General Manager Nicolas Torre III, dumanon ti 10,000 a TUPAD slots ti ilatang ti DOLE tapno tumulong a mangdalus kadagiti dalanan ti danom ken dadduma pay a kritikal a lugar kas panagsagana iti panawen ti panagtutudo.
Kasapulan ti kanayunan a manpower gapu iti kalawa ti kasapulan a madalusan ken kaadu ti basura kadagiti pagayusan ti danum.###
