BR LA UNION – Umaboten iti 2,177 a kaso ti leptospirosis iti nailista ditoy pagilian manipud Enero 4 agingga Hunyo 6, 2026, segun iti Department of Health (DOH), mas nangatngato ti 6% no idilig iti isu met laeng a panawen idi 2025.
Segun iti DOH Epidemiology Bureau, kaaduan kadagiti kaso ket manipud idiay Metro Manila, Central Luzon, ken CALABARZON, a masansan a mairep-report a malay-layus ken napaut a waterlogging.
Adda metten ti 77 a pimmusay gapu iti nasao a sakit ita a tawen, nangatngato ngem iti 70 a natay a nairekord idi napan a tawen.
Impalagip ti Department of Health iti publiko a liklikan ti agtukod iti danum ti layus nangruna no adda sugat iti kudil, ken dagus nga agpakonsulta iti doktor no makarikna kadagiti sintomas a kas iti gurigor, sakit ti piskel, nalabaga a mata, ken jaundice.
Ipatpatungpal pay ti Department of Health ti intensified information campaign kadagiti barangay ken pagadalan, bayat a mangipapaay dagiti lokal a gobierno ti doxycycline prophylaxis kadagiti high-risk individuals kas kadagiti rescue workers ken street sweepers.
Iti agdama, agtalinaed a nangato ti alert level ti DOH para iti leptospirosis, nangruna iti daytoy a panawen ti panagtutudo, ken agtultuloy a mamonitor dagiti ospital tapno masigurado ti umdas a suplay ti agas ken pasilidad para kadagiti pasyente.
