Aganay 20 nga indibidwal iti inispal ti Philippine Coast Guard (PCG) kalpasan a ma-stranded iti panaglayos nga ingubuay ti awan sarday a panagtudo kadagiti sumagmamano a paset ti pagilian.
Segun iti PCG, maisaysayangkat dagiti nagsisina nga rescue operation idiay Jordan, Guimaras ken Hamtic, idiay probinsya ti Antique ita nga aldaw.
Sangapulo iti naispal idiay Sitio Nabagatan, Barangay Poblacion, Jordan, Guimaras kalpasan a ma-trap iti nangato a danum ti layos. Kabayatanna, dua met a pamilya iti naispla idiay Hamtic, Antique kasaruno a ma-stranded.
Dumanon ti 60 a pamilya wenno nasurok 240 nga indibidwal ti naispal dagiti tropa kadagiti naisina met nga operasyon idiay Sarangani. Naisalakan dagitoy babaen iti social media post ken awan iti nailista a siasinoman a natay.
