BR LA UNION – Umabot iti 201.7 millimeters a buyat ti tudo iti nailista idiay Metro Manila iti uneg laeng ti lima nga oras idi kalman, Lunes, Agosto 17, a ginubway ti Southwest Monsoon wenno Habagat.
Segun iti Metropolitan Manila Development Authority (MMDA), maibasar daytoy iti datos ti PAGASA Science Garden Station idiay Quezon City manipud alas-9 ti agsapa agingga alas-2 ti malem idi kalman.
Iti uneg ti dua nga oras, manipud alas-12 ti tengngat aldaw agingga alas-2 ti malem, umabot a dagus iti 138 millimeters ti kaadu ti naibuyat a tudo.
Gaputi dayta, napartak a ngimmato ti danum ken napasamak ti panaglayos iti sumagmamano a paset idiay Metro Manila.
Dagus met a nangimuntar ti Metropolitian Manila Development Authority wenno MMDA iti flood control personnel a nangdalus kadagiti barado a drainage ken nangpapartak ti panagbaba ti layos.
