BR LA UNION – Immalma iti defense team ni Vice President Sara Duterte iti panagusar ti artificial intelligence wenno AI-generated images ti House prosecution panel tapno ipakita nu kasatnu kaadu iti P125 million a confidential funds a makunkuna nga in-withdraw ti maysa nga special disbursing officer ti Office of the Vice President.
Segun kenni defense spokesperson Atty. Michael Poa, kinuwestiyon da ti panagusar ti AI agsipudta mabalin a saan a maitunos ti maipakita iti aktuwal nga itsura wenno kaadu ti P125 milyon a cash.
Iti maika-16 nga aldaw ti impeachment trial, impakita ni private prosecutor Amando Ligutan ti AI-generated image ti mapatta-patta a P125 million, kabilang iti 1,000 bundle a sag-P125,000 usar ti P1,000 denomination.
Nangipakita pay ti prosecution ti AI-generated image iti uppat a duffle bag a makunkuna a naglaun ti P125 million.
Inlawlawag ni Ligutan a nagusar da ti teknolohiya agsipudta awanan da ti aktuwal a P125 million a cash tapno ipakita iti panagusig.
Ngem impaganetget ni Poa, a kasapolan a masiguro nga umuna iti accuracy dagiti ladawan a naipakita agsipudta mabalin a sobra wenno kurang iti representasyon ti AI iti aktuwal a kaadu ti nasao a kantidad ti kuarta.
Kabayatanna, imbaga ni prosecution spokesperson Atty. Benjamin Tolosa Jr. a visual representation laeng ti naipakita tapno matulungan iti testigo ken korte a makita nu kapad-pada dagiti bundle ti kuwarta ken bag a nausar iti transaksyon ti naipakita a ladawan.
Innayon na, nga imbaga ti testigo nga adda panag-pada iti naipakita a visual representation iti kuwarta a nakita ken dagiti bag a nausar a nakaikargaan dagitoy .
