BR LA UNION – Nagbanag a trahedya iti panagawid koma ditoy Pilipinas ti maysa a 62-anyos a Pinay caregiver kalpasan a natay iti aksidente dagiti tallo a behikulo idiay Taiwan idi Agosto 19.
Nabigbig ti biktima a ni Ebella Escolonia Cortes, nga agturong koman iti airport kadwa na iti dua pay a Pilipino nga amo na idi mapasamak ti aksidente.
Maibasar iti report, nagsardeng ti nagluganan da a van iti highway kalpasan a mairaman iti aksidente.
Bayat ti panagsarita dagiti dua a driver iti ruar ti lugan, kellaat a dimmungpar iti maysa pay a kotse.
Natay ti agsarsarita a dua a driver idinto a napurwan ni Cortes nga adda iti uneg ti van.
Kabayatanna, nadundunor ngem nakalasat iti dua nga amo na.
Nakalasat met ti driver ti kotse a nangdungpar kadagiti biktima.
Agpanpanawagan ti hustisya iti anak ni Cortes a ni Roy ken kiniddaw na a mapagsungbat ti responsable iti pannakatay ti inana.
Kabayatanna, siniguro ti Manila Economic and Cultural Office (MECO) iti tulong para iti pamilya ni Cortes ken naki-koordinar da metten kadagiti otoridad idiay Taiwan seknan iti imbestigasyon.
Manamnama a maiyawid ditoy Pilipinas iti bangkay ni Cortes inton Agosto 30.
