BR LA UNION – Umaboten iti 76 ti bilang dagiti natay iti nauram a ferry boat idiay Coron, Palawan.
Ita a rabii ti Sabado, kanayunan nga 41 a bangkay iti narekober ti Search and Rescue Team a buklen ti Philippine Coast Guard (PCG), Local Disaster Risk Reduction and Management Offices, coastal barangay ken dagiti lokal a mangngalap.
Segun kenni PCG spokeswoman Commodore Noemie Cayabyab, naiturong dagiti bangkay iti pantalan idiay Coron, Palawan.
Dagiti immuna a 30 a bangkay ket naiturong da metten kadagiti forensic experts tapno ipasidong iti proseso ken maamwan ti pakabigbigan dagitoy.
Agtaltalinaed nga 43 dagiti survivors.
Maibasar iti ticket manifest dagiti 134 nga indibiduwal, 13 ti unaccounted wenno missing ngem dua iti makunkuna a saan a naglugan iti nasao a barko.
Gaputi dayta, posible nga agbaliw pay iti nasao a bilang bayat nga agtultuloy ti recovery ken identification operations.
Agtul-tuloy met ti maisay-sayangkat a Search and Rescue (SAR) operations, tapno isalbar dagiti posible a nakalasat iti nauram nga MV JUNE ASTER iti kabaybayan ti Coron, Palawan idi rabii ti Miyerkoles, Setyembre 9, 2026.
