BR LA UNION – Impaganetget ni International Criminal Court assistant to counsel Kristina Conti a rumbeng metten a maipatungpal iti arrest order kontra kenni Senator Ronald “Bato” Dela Rosa, anyaman ti political reason wenno motibo.
Segun kenni Conti, mabalin nga ipatungpal ti Philippine National Police (PNP) wenno National Bureau of Investigation iti nasao a pammilin agsipudta addaan da ti law enforcement powers, idinto nga awanan ti bukod a police force iti ICC ken mangnamnama laeng kadagiti law enforcement agencies dagiti estado.
Idi Mayo 11, napaay iti National Bureau of Investigation a maaresto ni dela Rosa kalpasan a na-unseal iti ICC warrant kontra kenkuana.
Manipud idin saanen a nagpakita iti publiko ti nasao a senador.
Kinuna ni Conti a nakadepende pay laeng iti Philippine government iti panangipatungpal ti warrant order.
Kabayatanna, impaganetget met ni dela Rosa ken dagiti kaalyado na a saan a mabalin nga ipatungpal daytoy iti Pilipinas agsipudta immikkaten ti pagilian iti ICC idi 2019.
Nu maipapan met iti posible a dadduma pay nga ICC warrants seknan iti drug war, kinuna ni Conti a mabalin a nakasentro pay laeng ti korte iti kaso ni sigud a presidente Rodrigo Duterte.
Segun kenkuana, kangrunaan a kitkitaen ti ICC nu siasino ti addaan ti kadagsenan a sungsungbatan, ket nadakamat da duterte ken dela Rosa maibasar iti hierarchy.
