BR LA UNION – Apektado dagiti meat vendors iti merkado publiko idiay San Juan, La Union gapu iti panagraira ti panagparti ti baboy iti ruar ti palengke.
Segun kenni Arjel Macato, maysa a pork meat vendor, maysa kadagiti makitkita na a rason no apay nakapsot iti panaglakuan ket iti panagparti ken panaglako ti sumagmamano nga agtartaraken ti baboy iti ruar ti palengke.
Kinuna ni Macato a madanagan iti sumagmamano a backyard hog raisers a makaptan ti sakit nga African Swine Fever (ASF) dagiti taraken da isunga agdar-daras da a partien ken ilako dagiti baboy a taraken da, a masansan a mailako iti nalaklaka a presyo.
Impasigurado met ni Macato a nataltalged dagiti mailaklako a karne ti baboy iti merkado agsipudta dimmalan dagitoy iti panagamiris iti slaughter house.
Iti agdama, agbalor ti ₱330 kada kilo iti presyo ti boneless, ₱320 iti pork chop, bayat a ₱300 met iti pata.
Segun pay kenni Macato, kadawyan a pumigsa iti panaglako da ti karne ti baboy iti bulan ti Disyembre, partikular inton Paskua ken bisperas ti Baro a Tawen ken tunggal bulan ti Enero ken Pebrero.
Maysa pay kadagiti makaap-apektar iti pagbiagan da kas vendor ket iti saan nga stable a presyo dagiti produkto a petroyo.
