Impasigurado ti Department of Trade and Industry (DTI) nga awan pay ti nakaituding a panagngato ti presio dagiti kangrunaan a tagilako, iti laksid ti manamnama nga epekto ti Super El Niño.
Segun kenni DTI Secretary Maria Christina Roque, awan pay ti naawatda a kiddaw manipud kadagiti manufacturers para iti price increase, innayonna pay nga adda umdas a suplay iti merkado ken agtultuloy ti panangmonitor ti ahensia tapno mataginayon ti kinatalged ti presio.
Inallukoy ni Roque ti publiko a liklikan ti panic buying tapno saan nga agkurang ti suplay.
Kabayatanna, awan pay ti nairekord a nagbaliwan ti presio dagiti Christmas goods bayat a nakapamaysa ti DTI ti panangmonitor iti presio dagiti kangrunaan a produkto.
