Nakasaganan iti Department of Social Welfare and Development (DSWD) a mangipatulod ti ayuda kadagiti komunidad a posible a maapektaran ti namnamaen a panagserrek ti Super Typhoon Champi iti Philippine Area of Responsibility (PAR) ita a lawas.
Segun iti DSWD, addan ti 4,571,390 family food packs a nakaimbak kadagiti relief warehouse ditoy pagilian.
Malaksid iti daitoy, adda metten ti 344,942 non-food items ken 204,745 ready-to-eat food packs a mabalin a maipatulod kadagiti agkasapulan.
Kinuna ni DSWD Assistant Secretary Irene Dumlao, agtultuloy iti panagpatalinaed da iti aktibo a suplay dagiti kangrunaan a kasapulan babaen ti strategic hub ken warehouse ti ahensya tapnu napartak a maipaay dagiti kanayunan a tulong kadagiti komunidad a maapektaran ti diidgra.
Agtultuloy met iti produksyon dagiti family food pack kadagiti kangrunaan a production hub ti ahensya kas paset ti pinaregta a panagsagana iti posible nga epekto ti bagyo.
Segun iti ahensua, maiyannurot kadagiti addang iti direktiba ti Presidente a siguradoen nga umdas dagiti suplay ken napartak a maipaay dagiti relief assistance iti panawen dagiti didigra.
Banbantayan met ti state weather bureau iti garaw ti nasao a bagyo a namnamaen a mangapektar kadagiti lugar ditoy Northern Luzon, Cagayan Valley, ken amianan a paset ti Ilocos Region iti panagleppas ti daitoy a lawas.
