Insingasing ti maysa a Senate Finance subcommittee iti plenario ti Senado ti singasing a ₱28.04-bilion a badyet ti Department of Environment and Natural Resources (DENR) ken dagiti attached agency para iti tawen 2027.
Iti budget hearing nga indauluan ni Senador Risa Hontiveros ita a Lunes, inlawlawag ni DENR Secretary Juan Miguel Cuna a ₱20.62 billion ti mailatang iti central office, kadagiti bureau, regional offices ken dadduma pay nga opisina ti departamento.
Kabayatanna, ₱3.10 bilion ti nairanta para iti Environmental Management Bureau, ₱1.98 bilion para iti National Mapping and Resource Information Authority, ₱1.89 bilion para iti Mines and Geosciences Bureau, ₱284.35 milion para iti National Water Resources Board, ken ₱149.3 a milion para iti Palawan Council for Sustainable Development Staff.
Malaksid kadagiti programa ken proyekto ti DENR para iti sumaruno a tawen, inallukoy ni Hontiveros nga ipangruna ti ahensia ti panagsagana ken panagresponde iti emerhensia a mainaig iti pangta ti nakaro nga El Niño.
Segun iti senador, saan a rumbeng nga iti laeng publiko ti ag-adjust wennu makibagay iti posible a nasaknap a tikag, napateg met nga aramiden ti DENR ti akemna a mangsungbat iti kastoy a peggad.
Impaganetget pay ni Hontiveros a rumbeng a mailatang ti umdas a pondo para iti panagsagana ken madagdagus a wagas tapno maksayan ti epekto ti tikag iti ekonomia, salun-at ken inaldaw a panagbiag dagiti minilion a Pilipino.
