Pinapigsa ti Coast Guard District Northwestern Luzon (CGDNWLZN) ti kinasagana dagiti personnel ken alikamen kas panagsagana iti posible nga epekto ti Super Typhoon Rosal, nga addaan iti international name a Champi.
Segun iti Coast Guard District Northwestern Luzon, naisagana dan dagiti response equipment ken dadduma pay nga operational equipment tapno masigurado a makapag-responde da a dagus nu adda emerhensiya.
Immuna ti daytoy, nangisayangkat ti ahensya iti static display ken readiness inspection kadagiti rescue assets, emergency response equipment, ken dadduma pay nga alikamen a mausar iti rescue ken disaster response operations.
Nairanta ti aktibidad a siguraduen a nasayaat ti kasasaad, panagandar, ken nakasagana nga usaren dagiti alikamen iti panawen ti panagkasapulan, kasta met a mapadas ti kabaelan dagiti personnel a mangisayangkat iti napartak ken epektibo nga operasyon iti panagdurpak ti bagyo.
Dagiti posible nga insidente a sinaganaan ti Coast Guard ket dagiti aksidente iti baybay, layus kadagiti lugar iti igid ti baybay, ken dadduma pay a peggad a mabalin a patauden ti napigsa nga angin ken tudo.
Kabayatanna, amin a Deployable Response Groups (DRGs) ti distrito ket nakaipasidong ita iti standby status tapno masigurado ti dagus a panagtignay dagiti personnel ken alikamen no adda emerhensiya wenno kasapulan ti tulong kadagiti komunidad nga adda iti sakupda.
Kabayatanna, agtultuloy met ti pannakitinnulong ti ahensya kadagiti lokal a gobierno, disaster risk reduction and management offices, partner agencies, ken dadduma pay a maseknan tapno masigurado ti naannayas ken naurnos a panagresponde iti aniaman a posible nga epekto ti bagyo.
