Timmestigo idiay Sandiganbayan Fifth Division ni sigud a Department of Public Works and Highways (DPWH) Secretary Manuel Bonoan seknan iti petisyon para iti kadawatan a panag-piyansa ni Senador Jinggoy Estrada ita nga aldaw, Oktubre 27, 2026.
Iti testimonya, inbutaktak ni Bonoan a maipagarop a kimmiddaw ni Estrada iti proyekto nga agbalor ti P1 bilyon tapno mairaman iti national budget babaen ti sigud a DPWH Undersecretary a ni Robert Bernardo.
Segun kenni Bonoan, kimmiddaw para iti kanayunan a pondo babaen iti posisyon ti senador kas Senate President Pro Tempore ken maikon-konektar pay daytoy iti maipagarop a ginastos na iti eleksiyon.
Nupay P1 bilyon ti kiniddaw a pondo iti sidong ti Senate Leadership Fund, umabot laeng iti P700 milyon ti opisyal a naaprubaran iti General Appropriations Act (GAA).
Idi salodsoden ti kampo ti depensa nu sigurado daytoy, impaganetget ti sigud a sekretaryo nga awan ti rason tapno agdudua agsipudta nasinged nga aggayyem da Estrada ken Bernardo.
Naamwan a sigud a nagserbi a district engineer idiay Manila ni Bernardo idi panawen ti panagtakem ti ama ti senador a sigud a presidente Joseph Estrada kas mayor ti siyudad.
Iti agdama, awan pay iti sungbat ti kampo ti senador iti nagbalin a waragawag ni Bonoan iti sango dagiti mahistrado.
Nupay kasta, mangnamnama daytoy a mapatgan ti kadawatanna a makabayad ti piyansa ken makasubli iti trabaho idiay Senado.
