Nagpanawagan ni House prosecution spokesperson Lanao del Sur Rep. Zia Alonto Adiong iti Senate impeachment court iti patas a pannakaipatungpal iti agsumbangir a dasig ti sub judice rule wenno ban on statements a mabalin a mangapektar iti impeachment trial kontra kenni Bise Presidente Sara Duterte.
Kasaruno daytoy dagiti statement ni Duterte spokesperson Paolo Panelo a mangkuestion iti proseso ti trial ken iti pannakapasubli ti prosecution panel ti tallo nga artikulo ti impeachment a mainaig iti confidential funds, bribery, ken grave threats.
Segun kenni Adiong, nasken a suroten amin nga agsasao iti agsinnumbangir a dasig daytoy nga allagaden.
Impaganetgetna pay nga adda bileg ti Senado kas impeachment court a mangikeddeng iti bukodna a paglintegan ti trial.
Kabayatanna, impapilit ni Panelo a nasayang ti pondo ti publiko ken saan a naikkan iti gundaway ti Bise Presidente a mangsungbat kadagiti naikkat nga alegasion. Depensa ni Adiong ket saan a masayang ti pondo no mausar ti proseso a mangsungbat kadagiti opisyales ti gobyerno.
Ita pay laeng, ti laeng Artikulo II ti sursuroten ti prosekusion kalpasan nga inawat ti Senado ti pannaka-withdraw dagiti tallo nga artikulo ti impeachment.
