Kumidkiddaw iti bukod na a puwesto ti maysa a vendor nga aglak-lako iti sangwanan ti simbaan ditoy siyudad ti San Fernando.
Ni Agnes Balansay, nga aglaklako iti ay-ayam, kandila, candy, ken dadduma pay a banag ket 40 a tawenen a vendor ngem agingga ket agtaltalinaed nga awan ti makuna a bukod na a puwesto.
Ngem iti laksid ti rigat ti biag ken karit ti panag-lako, saan a nagbalin a lapped daytoy kenni Balansay tapno ituloy latta iti nasao a klase ti pagbiagan tapno maipaay ti inaldaw a kasapulan ti pamilya na.
Imbaga ni Balansay a nupay kasta iti napili na a wagas a pagbiagan, napagturpos na iti panagadal dagiti uppat nga annakna ken ditoy pay ti pangal-alaanna ti paggatang para iti agas a maintenance na.
Kid-kiddawen na iti lokal a gobyerno a maipaayan ti natalged a puwesto agsipudta nagbalinen a karit kadakuada nga aglaklako, iti pannakapapanaw da iti lugar a paglak-lakwan da gaputi kinaawan ti permit, a masansan a rason ti temporaryo a panagsardeng da nga aglako.
Segun pay kenni Balansay pinadasda nga aramiden a makompleto dagiti kasapulan a dokumento tapno makaala ti permit, ngem agingga ita, saanda pay a naikkan ti kabukbukodan a pwesto.
