Inlibak ti Philippine National Police (PNP) a natakyasan ti pugante a ni sigud a Bureau of Corrections (BuCor) chief Gerald Bantag dagiti otoridad kalpasan a maipagarop a natakuatan daitoy idiay Ifugao.
Segun kenni Police Colonel Allen Rae Co, hepe ti PNP Public Information Office, dagiti pulis idiay Ifugao ket nangisayangkat laeng ti beripikasyon kalpasan a makaawat ti report a maipagarop nga nakita idiay ni Bantag.
Nupay kasta, kalpasan iti beripikasyon, napaneknekan nga awan idiya ti sigud nga opisyal.
Impaganetget ni Co nga agtultuloy nga ipatpatungpal ti PNP dagiti warrant of arrest kontra kadagiti wanted person, aniaman iti pakabigbigan da.
Maipalagip a nagwaras iti damag a natakuatan ni Bantag iti maysa a poultry farm, ngem maipagarop a nakatakyas daitoy idi dimteng dagiti pulis.
Idi Abril 2023, nangiruar ti warrant of arrest iti Muntinlupa Regional Trial Court kontra kenni Bantag mainaig ti kaso a murder, kalpasan a maitudo kas mastermind iti panangpapatay ti broadcaster a ni Percival “Percy Lapid” Mabasa.
