Saan a makirinrinnikyar ti Pilipinas iti China wenno iti sabali a pagilian. Daytoy ti sungbat ti Armed Forces of the Philippines kalpasan ti statement ni Bise Presidente Sara Duterte idiay Hongkong a liklikan dagiti opisyales ti gobierno ditoy pilipinas ti pannakisinnupiat kadagiti sabali a pagilian a pakairamanan ti China, iti baet ti agtultuloy a tension iti West Philippine Sea.
Segun kenni AFP Spokesperson for the West Philippine Sea Retired Rear Admiral Roy Vincent Trinidad, agtaktakder laeng ti Pilipinas kadagiti inted ti Dios a karbengan na a pakairamanan ti maritime entitlements, sovereignty ken sovereign rights.
Kinunana, a sigsiguraduen laeng ti AFP ken ti Department of National Defense a ti sumaruno a henerasion dagiti Pilipino ket agtawid iti sibubukel ken nawaya a Pilipinas.
Kasarno iti daytoy, impaganetgetna nga awan met iti tagtagikuaen ti Pilipinas a saanna kukua, isu a saan a maibaga a mangsugsogsog daytoy iti riribuk.
Kabayatanna, kinuna pay ni Trinidad nga amin a Pilipino ket addaan iti moral nga obligasion a mangidepensa iti nasional nga interes ti pagilian.
