Dimmanon iti 4.49 milyon a metric tons iti rice imports ti Pilipinas as of October 29, nangatngato iti 3.39 milyon metric tons idi napalabas a tawen, kasaruno ti namnamaen a panagbaba ti lokal a produksiyon gapu iti El Niño.
Vietnam iti kangrunaan a supplier ti imported a bagas ditoy pagilian, nga addaan ti 2.79 milyon a metric tons wenno 62.3 porsiyento ti pakabuklan nga imports, maikadua iti Thailand nga addaan ti 666,201 metric tons.
Saan a suspendiren ti gobierno iti rice imports ita a tawen tapnu masigurado iti umdas a suplay, kasaruno ti namnamaen a panagbaba ti lokal a produksiyon ti 900,000 agingga maysa a milyon metric tons gapu iti nakaro a kalgaw.
Kabayatanna, dimmanonen iti P9.99 bilyon iti perdision ti sektor ti agrikultura as of November 11, a nakaapektar iti nasurok 324,000 a mannalon ken mangngalap.
Kadakkelan a perdision iti mais nga aggatad ti P5.63 bilyon, bayat a P3.65 bilyon met iti nailista a perdision iti pagay.











