Inlawlawag ni House Senior Deputy Speaker ken South Cotabato 2nd District Rep. Ferdinand “Dinand” Hernandez nga awan kinapudno na iti rimwar a damag idiay Kamara de Representantes a maitantan ti eleksiyon inton 2028 tapno mapalawa ti termino dagiti nakatugaw nga opisyal.
Inaramid ni Hernandez iti waragawag kas sungbat iti imbaga ni Atty. Paolo Panelo, tagapagsarita ni Vice President Sara Duterte, nga adda iti sumagmamamno a mammanday linteg a mangtal-talantan iti posible a no-election scenario, term extension, ken panagakar iti parliamentary form of government.
Impaganetget ti mammanday linteg a nalawag a nakailanad iti Konstitusyon iti termino dagiti nabotosan nga opisyal ken iti regular a panangisayangkat ti eleksyon, isunga saan a basta baliwan daytoy dagiti kongresista.
Kinarit na dagiti mangiwar-waras ti nasao nga alegasyon a mangirwar iti nalawag ken beripikado nga impormasyon, kagiddan iti panawagan nga agbalin a responsable iti panangipaay ti waragawag iti publiko.
Kabayatanna, pinaglibakan met ni House Deputy Speaker ken La Union 1st District Rep. Paolo Ortega V iti ispekulasyon nga adda malut-luto a plano idiay Kamara, a panang-suspindir iti 2028 elections tapno pawaywayan ti termino dagiti opisyal.
Imbaga ni Ortega nga awan ti basaran ken panang-tikaw iti inwaragawag ni Atty. Panelo.
Siniguro ni Ortega nga agtalinaed a naka-pokus iti liderato ti Kamara iti gakat a 2027 national budget ken kadagiti programa a makatulong kadagiti umili ken impaganetget na pay a dagiti umili a Pilipino ti agdesisyon iti eleksiyon inton 2028.











