Pormalen nga impatulod ti Senate Committee on Ethics and Privileges kenni Senador Ronald “Bato” Dela Rosa ti reklamo a naipila kontra kenkuana mainaig iti napautna a panagabsent kadagiti opisyal a trabaho idiay Senado, ken naikkan daytoy iti 15 nga aldaw tapnu mangisubmitir iti sungbatna.

Segun kenni committee chair Senador Vicente “Tito” Sotto III, umdas ti porma ken linaon dagiti reklamo nga inpila ti civil society group a Wag Kang KuCorrupt kalpasan a mangisubmiti ti grupo ti kanyunan nga affidavit.

Naipila ti reklamo idi Pebrero 25, 2026 ti grupo nga indauluan ni sigud a Finance Undersecretary Cielo Magno. Impaganetgetget ti nasao a grupo a ti panangbaybay-a iti trabaho ken ti agtultuloy a panagabsent ni Dela Rosa bayat nga umawawat iti sweldo manipud iti pondo iti publiko.

Kiniddaw pay ti grupo a patawan ti pannusa ti senador ken suspendien ti binulan a sueldona maitunos iti prinsipio a “no work, no pay.”

Nangrugi ti saan a regular a panagserrek ni Dela Rosa kadagiti sesion idi Nobiembre 2025, kasaruno dagiti report mainaig iti maipagarup nga arrest warrant ti International Criminal Court (ICC) kontra kenkuana mainaig iti kaso a crimes against humanity a nagtaud iti kampania kontra iti illegal a droga bayat ti administrasion ni sigud a presidente Duterte,nu sadino a nagserbi daytoy kas Philippine National Police (PNP) chief.

Nairekord ti 31 a panagabsentna iti 58 nga aldaw ti session iti umuna a regular session ti 20th Congress. Idi Pebrero 2026, naikkat met daytoy iti amin a puestona kadagiti komite ti Senado.