Umad-adu a kompania ti silulukat a mangtangdan kadagiti nagturpos iti senior high school.
Maibasar daytoy iti panagadal nga insayangkat ti Philippine Business for Education (PBEd).
Iti sidong ti 2024 Jobs Outlook Study ti Philippine Business for Education, rimuar iti umad-adu a posibilidad a mangtangdan dagiti kompania kadagiti nagturpos iti K-12 no sadino nga uppat iti kada lima a firm ti ‘willing’ a mang-hire kadagiti senior high school graduates.
Ti kasta a panagadal ket sakupen ti 299 a nakipaset a nakairamanan ti 14 a dadakkel a kompania bayat a ti 86% ket buklen dagiti micro, small and medium enterprises (MSME).
Segun iti Philippine Business for Education, pammaneknek daytoy iti potensial ti K to 12 program ti pagilian a makabael a mangpataud kadagiti employable graduates.
Dakkel a panagbalbaliw daytoy no idilig iti panagadal a naaramid idi 2008.
Iti dayta a tawen, agparang a maysa iti kada lima a kompania ti ‘willing’ a mangtangdan kadagiti nagturpos iti senior high.
Kabayatanna, ipakita pay daytoy a panagadal a 27% kadagiti entry-level jobs iti pagilian ti posible a punnuan dagiti senior high graduates idinto a ti nabati a 73% ket punnuan pay laeng dagiti nagturpos iti kolehio.
