LA UNION – Naan-anayen a linteg iti Republic Act No. 12022 wenno Anti-Agricultural Economic Sabotage Act kalpasan a pirmaan ni Presidente Ferdinand Marcos Jr. idi kalman iti Kalayaan hall idiay Palasyo ti Malakanyang.
Iti sidong ti gakat, mapatawan ti mas nadag-dagsen a pannusa dagiti maatap a karaman iti panag-sabotahe iti ekonomiya kas dagiti smugglers ken hoarders.
Iti panagbetla na iti ceremonial signing idiay Malacañang, impaganetget ni Pres. Marcos a ti economic sabotage ket maysa a “non-bailable offense” katukad ti pannusa a life imprisonment ken multa a mamin-lima a daras iti balor dagiti nakumpiskar a produkto.
Ranta ti baro a linteg a papigsaen iti agricultural sector ditoy pagilian, babaen iti pananglapped dagiti illegal activities a tubeng iti suplay ti taraon ken mangigubway ti panagngato iti presyo dagiti kangrunaan a gagatangen.
Segun kenni Presidente Marcos, ti nasao a linteg ket maysa a proactive nga addang tapno maliklikan ti panagserrek dagiti smuggled agricultural products ken masiguro ti pagrebbengan a panagbayad ti umno a buwis.
Gaputi napasamak nga agricultural smuggling, nalugi ti Pilipinas iti aganay P3 billion idi 2023, segun iti Presidente.
