BR LA UNION – Inaresto dagiti otoridad ti maysa a babae idiay Science City of Muñoz, Nueva Ecija kalpasan a makumpiskaran ti P1.65 million a cash iti maysa a Comelec checkpoint, segun iti Police Regional Office III (PRO3).
Nakumpiskar dagiti nasao a kuwarta idi Sabado idiay Barangay Poblacion West, kalpasan a nadlawan ti pulisya iti apagapaman a nakalukat nga eco-bag a naglaun daytoy ti P1,000 bills. Inaklon met ti suspek a P1.65 million iti karga ti bag.
Sumango ti suspek iti kaso a panaglabsing iti Section 28 ti Comelec Resolution No. 11104, a maipawil ti agimet ti nasurok P500,000 iti uneg ti dua nga aldaw sakbay iti eleksiyon ken iti mismo nga aldaw ti eleksyon, malaksid nu adda iti awtorisado a pammalubos.
Segun kenni PRO3 Director Brig. Gen. Jean Fajardo, seryoso iti direktiba a siguradwen a nadalus, patas, ken natalged iti Halalan 2025.
Iti pakabuklan, nasurok 400 a vote-buying, vote-selling, ken panangabuso iti pondo ti gobyerno iti naawat ti Kontra Bigay Committee ti Comelec seknan iti Midterm Election 2025.
