LA UNION – Saanen a nakadanon pay a sibibiag iti ospital ti maysa a 22-anyos a baro kalpasan a pinang-or ti nakasinnupiatna idiay ili ti Agoo, La Union.
Nabigbig ti pimmusay a ni Adrian Dulay, residente ti Brgy. Sta. Ana.
Maibasar iti imbestigasion ti Agoo Police Station, naamuan a naggiinom ti grupo da Dulay ken ti grupo ti suspek a ni Jerick Tatunay, 21-anyos idi kellaat a rimsua ti saanda a panagkinnaawatan.
Iti saanda a ninamnama a kanito ket kellaat a pinang-or ni Tatunay iti natangken a banag ti ulo ti biktima a nagbanag iti pannakatumba ti naud-udi agingga a natalimudaw.
Dagus met daytoy a naitaray iti La Union Medical Center ngem naideklara a dead on arrival.
Iti agdama ket tengngel dagiti otoridad ti suspek nga agtultuloy a maim-imbestigaran.
